de Zeit gitt as Land, und su isses amool wieder Zeit, wos neues a der Träbcher Seite zu machn und zu gutter Letzt oh e neues Grußwurt zu vorfassn!
Zwee Joare woar jo nu dos aale zu laasn!
Oh wenns su und su wiederamool Zeit wurd, unse Seite bissl zu erneuern, goabs und gibt's ann ganz besundersch wichtchn Grund,
der dos oabsuluut nuutwendch waarn hott lussn: a gruuses Jubiläum stitt bevuur -
Träbchen wird 600 Joahre!
Zumindestns 600 uffizielle Joare, die sich noachweisn lussn, seit der irschtn direktn Urtsnennung 1412!
Miehr erfoahrter wenner druffklickt. S is a denkwärdcher Oanluss, oallemool, den man ne eefoach su sull vurbeigiehn lussn, uudr??
Sunstn hoach versucht, de Seite bissl weiter auszubaun und zu modernisiern. De Zeit bleibt joa ne stiehn, und keener dar zufällch haarkimmt,
a unser Durf udr uff unse Seite, sellt denkn, mor wärn vun gastern!
Goanz neu is zum Beispiel de
interaktive Landkoarte
! Se zeigt Träbchn vun ubm, woas schunne oa und fir sich recht intressant is,
koann auswärtchn halfn, sich haarzufindn, und außerdem hoach no anne Menge intressante Stelln an Durfe und drimrim moarkiert!
Su vill gibt's hie zu sahn, denk ock!
Su is vur oalln Dingn de Hauptseite no bissl informativer gewurn. Do findtr immer n aktuelln Watterbericht,
de frischstn Neuigkeetn und Dermine, und fir oalls wosses ne gibt, weisn de externen Links hin, rechts unten.
Woas oh no neu is, is anne
Facebook-Seite
fir Träbchen, die oh vurne verlinkt is! Bekanntlich machen joa viele von euch mit bei
dam sozioaln Netzwerke, und do gucktr durte sicherlich regelmäßer rein als wie hier! Su sulls durte oh immer de wichtchstn Neuigkeetn
gaan und oalls wos sunstn no wichtsch is und mit unsrm Durfe zu dun hoat. Klickt eefoach "Gefällt mir" und ihr wisst immer Bescheed!
Am Schlusse willch seun, doassch mich frää, doases uns no gibt, doas Durf und de Seite, und will mei Bestes dun, doasses oh no anne Weile weitergitt.
Ideen, Vurschläge, Kridiggn und Materioal is weiterhin jederzeit willkumm. Oh wemmer weencher an Durfe sin gewurdn, moanch eenr laabt nimmi,
viele jingre vun euch sin furtgegang, manche wulltn - viele musstn, ah e poar sin no doa, ´s gibt sugoar e poar jungche Zugezeune!
Und viele vun dänn die furt sein, sein an Härzn Träbcher gebliebn!
Besundrch vir diejenchn huffch, doass die Seite hier oh e Stickl virtuelle Heemt sein koann,
die euch de richtsche Heemt ne vergassen lässt, sundrn droan erinnert, wie schiene se eenglich woar und und oh gebliem is, und dies seelt wert sein,
euch a dr Fremde zu bestärken, und oh moa wiederzukumm, seis zu Besuch, uder goar fir ganz! Doas woar mir no wichtsch zu seun!
Do winsch ich euch viel Spoaß hie, oalles Gute im Oallgemeinn, und guckt ock ab und zu amool rein!
Berko
Euer Webmeester