Träbchen, Ende Januar 2010

 

Liebe Träbcher und Besucher vun unser Seite,

Seit ehm gansn Monoat hoammer nu schunne ‚s Joahr 2010. Zähn Joahre sinn oalso schunne vorgang, seit mer grußoartch dos su genannte Millennium hoan gefeiert. Man wellts kaum gloobn. Doamools woarch denkwärdch, wie mo uff eemool statt 1999 ne 2000 zu schreibn hottn! Kaum hoatmer uns do droanne gewehnt, poassierte woas andres, woas ne weencher denkwärdch woar:

Im Dezember 2000 ging die irschte Version von dieser Seite hier, www.troebigau.de, as Netz! Aus heutcher Sicht nischt oallzu besundersch, ah doamools woar doas no a ander Ding! Oack weil a boar doazemools no Jugendliche bei an Durffeste die dämliche Idee hoattn, suwoas machen zu müssen! Jedenfolls hoan mer gans schiene fer Uffsähn gesurgt!

Nu sinn oalsu schunne baal 10 Joahre vorgang, seit doas fier sich ging. Unse Seite gibt’s immer no, wie er sähn kennt, oallerdings woarsch ne immer eefach. Zwee vun den drei Gründern der Seite hoan schunn lange unser Durf verloassn, und dor eentsche vorbliebne, woas ich bin, treibts’ch oh ock egoal a dr Weltgeschichte rim, und hoatte deseftern keene Zeit und oh ne de rechte Inspiration, um das ganze weiter vuroan zu treim. De meisten soahn das joa oh ein, ah mitn Joahr häufte sich dann do de Kridik! Und ich muss seun, mir woarsch baal oalleene e bissl elende, doas es hier schunne su veraltet aussoahg. 2004 hoabch’s mool geschoafft, anne neue Version reinzustelln, ah dosseit ging nimmi viel lus.

Aber nu hoammer zweedausndzähne! Bevor die Seite nu im Dezember wirklich ihr Jubiläum hoat, musste sich oalsu woas duun! Hier sährersch Ergäbnis! S is ne oalles neu, man sull joa ne oalles altbewährte wegschmeißen, aber vieles wurde aktualisiert und a poar neue Sachen sinn oh derbei.

Es Highlight sull noatierlich unser neues grußes Fotoalbum sein! In verschiednen Kategorien findeter diverse Uffnoahmen rund um Träbchen, suwohl Loandschaftn, lustche Bilder vun Durffestn und no a poar Spezioalitäten! Viel Spoaß bein Blättern! Ihr kennt sugoar euern Senf zu de Bilder derzugahn. Mir hoan oh vier, doas Album ständch zu erweidern und verbessern, sellt vun Euch jemand no andre intressante Bilder hoan, egoal ob aale uder neue, und meent, doass die hier mit gezeigt kenntn wärn, ock immer her dermitte! Egoal ob per Mail uder uff Papier!

Anne andre Neuheet is dar su genannte Event-Kalender! Den sähter oh glei vurne uff der Hauptseite! Doa hoammer vier, oalle meeglichen Termine einzutroagen, egoal ob doas Festl sin, Jubiläen uder sunstche Ereignisse. Und wenns de Müllabfuhrtermine sinn! Ihr kennt sugoar selber Termine eintroagen, die mussch dann ock freischaldn. Ich wärsch ne immer glei sähn, ah wer mir Miehe gahn, doass doas in der Regel innerhoalb vun 24 Stundn poassiert!

Endlich gibt’s oh wieder anne neue Umfroage, glei uff der Stoartseite. Su hoabter oalsu verschiedne Meeglichkeetn, interaktiv an der Seite teilzunähm! Dor virtuelle Schmiedenstammtisch, s Gästebuch und de Weltgästekoarte stiehn nadierlich oh weiderhin zur Verfiegung!

Zum Schluss no a poar Dankeswurte. Zum een mechtch mich bei oall den mehr wie 15.000 Besuchern bedanken, die während der letzten 9 Joahre hier reingeguckt hoan, sich teilweise am Stammtisch uder im Gästebuch verewigt hoan und mir su gezeigt hoan, doass sich de ganze Miehe luhnt! Man hat joa manchmoa dan Eindruck, doass bei uns im ostdeutschn Hinterland e bissl n Bach rundergeht, immer no is de Oarbeetslus’chkeet zu hoch, viele junge Leute hoan keene Perspektive und haun vun hier ab! Ich huffe, mit anner bessern virtuellen Präsenz vun Träbchen kemmer wingstns e klee bissl gegensteuern und e bissl mehr Läben a de Region bring!

Besundersch danken mecht’ch namool denjeenchn, die hier aktiv mit gehulfm hoan, mit Fotos und andern intressantn Materioalien. Zu nenn wärn doa Marten Wobst, Reiner und Tim Drogla, Robert Müller, Jens Kutzke und Reinhard Kurzweil. Wennch sellt jemoandn vergassn hoan, bittch um Entschuldchung und Benoachrichtschung!

Ich huffe, ihr hoattet keene Schwierigkeetn, dieses Grußwurt uff Äberlausitzch zu läsen, wenn man sich doa ehmool reingeläsen hoat, is doas goar ne su schwer! Und unse Sproache sull joa oh fer kinftche Generationen bewoahrt wärn!

Ich winsch euch vill Spoaß hier uff der Seite, huffe die neue Version gefällt euch und ihr nutzt de aaln und neun Meeglichkeetn, um aktiv woas beizusteuern uder eefach zu kommentieren!

E Prost uff de Heemt!

Berko

Euer Webmeester